Tuesday, September 27, 2011

علي انغام العنصرية هيا بنا نغني

,      استكمالا لمشروع ترسيخ العنصرية و نعرات الكراهية في المجتمع المصري ، قام بعض الافراد الغير مسئوليين   بتدوال فيديو
 يسخر من لاعب الزمالك محمود عبد الرازق الشهير بشيكابالا ، مصورا شيكابلا فتي اسود البشرة يبدو علي لكنته انه ينحدر من اصول نوبية 
تعامل الكثيرين مع الفيديو باريحية ومرح و اتخذه البعض فرصة لاطلاق الدعابات .
و لكنني لم اشعر باي ظرافة و لا لطافة من الفيديو المذكور ، بل علي العكس قادني لسلسة من الحوارات الحادة العنيفة و كان جدير بتكدير يومي ، و ذلك لانه ببساطة عنصري ، يرسخ للصور النمطية عن سود البشرة و النوبيين في مصر ، فالفتي كان الشكل التقليدي للنوبي يعمل في وظيفة قليلة الشأن ، بواب و لكنته مضكحة لاصله النوبي ، و هذا طبعا قادر علي ايقاظ كمية الم قادرة علي تكديري و 
   احساسي  القاتل بالرغبة في سب كل مطاول 



لغريب ان بعض الظرفاء طرح كمية افكار مريضة منها مثلا ، و ما الجديد في ذلك ايتو ينعت بالقرد في اسبانيا و دروجبا يلقي عليه
 قشر الموز ، و اضاف ان العنصرية ليست ضد السود و لكن ضد الشواذ و ضد الايموز ، و البعض وصفني اني اهول الامور و استعجب ما المشكلة في المشكاسات بين جمهور الاهلي و شيكابالا ، علي الرغم المشاكسات اللطيفة تمتد لحد السب بالام و المعايرة باللون و يرد شيكابالا ذو الاعصاب المنفلتة بردود لا تقل بذاءة  ، تتراوح من رفع الحذاء ، انتهاءا باستخدام اصابعه بشكل غير ودي
  علي اية حال لم اغضب دفاعا علي شيكابالا ، رغم انني كمشجعة للزمالك احبه كاهم اركان الفريق، الا انني اخذ عليه انفلات  اعصابه،
، لكم مللت من الكلمات الجوفاء التي تقال في الاعياد و المناسبات الرسمية من نوعية ان النوبيين من النسيج الوطني و التباهي بدورهم في حرب اكتوبر و ان لغة التواصل هي اللغة النوبية و ما عداها من كليشهات ، بهتت من كثر استخدامها
لم اعد احتمل سخافات و تعليقات سمجة لها و اعتقد ان من يهتم ان تصبح مصر اكثر احتراما لادمية ابنائها ، عليه ان يمعن التفكير في هذا الشأن ،غضبت لردة في شعب يدعي انه متأخي و متماسك و يدعي انه يحترم التنوع الثقافي و الديني و النوعي
 
كل ما اردت ان اؤكد عليه  ان ما  يمثله هذا الفيديو هو الحط من شأن افراد للونهم او اصلهم العرقي ، و هذا ابسط تعريف للعنصرية، في دول اكثر تقدما من الناحية التشريعية  تتخذ الاعراف الدولية و المواثيق شرعة لها ، من السهل جدا مقاضاة مثل ناشر هذا الفيديو و  اتذكر قضية هيفاء وهبي حين قالت قردي النوبي و رفع عليه مجموعة منت المحاميين النوبيين قضية، الا انهم اثاروا السلامة و لم يستكملوا اجراءات التقاضي 
علي اية حال انا غضبانة و العنصرية بالفعل مرض مستشري في مصر ضد فئات كثيرة  و اعتقد اننا علينا اعادة تعريف الكثير من الاشياء و علينا ان نتحلي بالشجاعة لتسمية الاشياء باسمائها 

Sunday, September 4, 2011

علي هامش اعتصام النوبيين المطالبين بحق العودة

انا عارفة اني منفعلة و غضبانة جدا و انا باكتب التدوينة دي بس بجد اللي بيحصل النهاردة في القضية النوبية في مصرفاق قدرتي علي التحمل
يعني مش قادرة افهم و لا اصدق الصلف و العنجهية اللي بنتعامل بها من كل الحكومات المصرية من عهد عبد الناصر لغاية عهد المجلس العسكري المجيد . سكتنا علي تهميش و استبعاد و تعامل فوقي و انتقاص من مواطتننا و انتهاك لابسط حقوقنا  في عيشة كريمة لعقود طويلة .
عانينا من  غباء ادارات متعقبة اتعاملت معنا اننا شنطة تتحط و تتشال في اي حتة تعجبهم و لا كأننا بني ادمين اصلا و لا اننا مجتمع له خصوصيته الثقافية و العرقية . ، ليه يعني نتهجر في قرن واحد 3 مرات ، في شرع مين دة . في كل مرة كانت الحكومة تختار بين الكتلة البشرية النوبية و مشاريعها التنموية اللي غير مخططة بدقة ، كانت الحكومة بتضحي بالبني ادمين . من يقول ان في التهجير الابشع و الاخير في 64 اليونسكو و الحكومة و العالم كله يخاف علي الحجر اكتر من البني ادم ، ليه الكل يهتم بنقل المعابد و البني ادم اللي عاش في ظلها و جدودهم هما اللي  بنوها يترموا في صحراء بعد ما كان عايش في جنة خضراء .
انا كمان ممكن اتكلم من هنا لبكرة علي التعويضات الهزلية اللي خدناها عن بيوت و اراضي و مواشي و نخيل ، غرقوا و خدنا فيهم ابخس الاثمان
لو في اي انسان منصف يروح مركز نصر النوبة يشوف الوضع عامل ازاي ها يعرف اننا برة دائرة  اهتمام الحكومة اصلا .
دة غير معاناة اللي راحوا المدن الكبيرة ، شفنا عنصرية و طبقية ما رحمتش حد  ، دة غير مسخ الجيل الثاني و الثالث ،ما نعرفش عن ثقافتنا و تراثنا الا اقل القليل ، ليه انا اتولدت في بلد تعلمني لغة الاغلبية و انا لغتي الام ما اعرفش اقول منها الا ازيك و مع السلامة . مفيش و لا سطر في اي كتاب تاريخ في المدارس عن الحضارة النوبية ، اكنها اصبحت نسيا منسيا .
و اللي زاد و غطي اللي بيحصل بعد الثورة ، بجد لو رغبة في تحقيق دولة قائمة علي المواطنة كانت المفروض تأخذ خطوات لتحسين الوضع ، بس هما بيتعاملوا معنا انهم كل ما يرموا لنا الفتات ها نفرح بها و نسكت ، زي القرار بتخصيص ارض النوبيين اللي اصدره عصام شرف . بس بجد اللي حصل النهاردة في الاعتصام بتاع حق العودة مخزي، الجيش ازال الخيم و اعتقل اتنين ، ليه يعني !!!! و لسة الاحداث ها تتصاعد بعد القرار المخزي بضم دائرة كوم امبو لدائرة نصر النوبة ، المجلس العسكري و حكومته شلة كدابين ، بيقولوا كلام و يرجعوا فيه زي العيال
اه الحريق اللي حصل و اعمال العنف ما ترضيش حد ، بس الكبت و الظلم يخرجوا اي انسان عن شعوره و احنا سكتنا كتير و خالص بقي مش ها نسكت تاني و لا ها نرضي نبقي مواطنين درجة تانية ، احنا مش طالبين فضل من حد ، حقنا ها نأخد ها نأخده و ها نفضل نطالب به و مش ها ننسي مهما غسلوا دماغنا و عربونا
و ها نرجع للبلد القديمة ، لو مش النهاردة يبقي بكرة ، غصب عن عين التخين 
كلمة اخيرة واقفة في زوري عايزة اقول للمشير طنطاوي كتر الف خيرك ، اثبتت ان كل الحكومات عمياء و غبية  في تعاملها معنا حتي لو كان اللي رأسها نوبي