Sunday, September 4, 2011

علي هامش اعتصام النوبيين المطالبين بحق العودة

انا عارفة اني منفعلة و غضبانة جدا و انا باكتب التدوينة دي بس بجد اللي بيحصل النهاردة في القضية النوبية في مصرفاق قدرتي علي التحمل
يعني مش قادرة افهم و لا اصدق الصلف و العنجهية اللي بنتعامل بها من كل الحكومات المصرية من عهد عبد الناصر لغاية عهد المجلس العسكري المجيد . سكتنا علي تهميش و استبعاد و تعامل فوقي و انتقاص من مواطتننا و انتهاك لابسط حقوقنا  في عيشة كريمة لعقود طويلة .
عانينا من  غباء ادارات متعقبة اتعاملت معنا اننا شنطة تتحط و تتشال في اي حتة تعجبهم و لا كأننا بني ادمين اصلا و لا اننا مجتمع له خصوصيته الثقافية و العرقية . ، ليه يعني نتهجر في قرن واحد 3 مرات ، في شرع مين دة . في كل مرة كانت الحكومة تختار بين الكتلة البشرية النوبية و مشاريعها التنموية اللي غير مخططة بدقة ، كانت الحكومة بتضحي بالبني ادمين . من يقول ان في التهجير الابشع و الاخير في 64 اليونسكو و الحكومة و العالم كله يخاف علي الحجر اكتر من البني ادم ، ليه الكل يهتم بنقل المعابد و البني ادم اللي عاش في ظلها و جدودهم هما اللي  بنوها يترموا في صحراء بعد ما كان عايش في جنة خضراء .
انا كمان ممكن اتكلم من هنا لبكرة علي التعويضات الهزلية اللي خدناها عن بيوت و اراضي و مواشي و نخيل ، غرقوا و خدنا فيهم ابخس الاثمان
لو في اي انسان منصف يروح مركز نصر النوبة يشوف الوضع عامل ازاي ها يعرف اننا برة دائرة  اهتمام الحكومة اصلا .
دة غير معاناة اللي راحوا المدن الكبيرة ، شفنا عنصرية و طبقية ما رحمتش حد  ، دة غير مسخ الجيل الثاني و الثالث ،ما نعرفش عن ثقافتنا و تراثنا الا اقل القليل ، ليه انا اتولدت في بلد تعلمني لغة الاغلبية و انا لغتي الام ما اعرفش اقول منها الا ازيك و مع السلامة . مفيش و لا سطر في اي كتاب تاريخ في المدارس عن الحضارة النوبية ، اكنها اصبحت نسيا منسيا .
و اللي زاد و غطي اللي بيحصل بعد الثورة ، بجد لو رغبة في تحقيق دولة قائمة علي المواطنة كانت المفروض تأخذ خطوات لتحسين الوضع ، بس هما بيتعاملوا معنا انهم كل ما يرموا لنا الفتات ها نفرح بها و نسكت ، زي القرار بتخصيص ارض النوبيين اللي اصدره عصام شرف . بس بجد اللي حصل النهاردة في الاعتصام بتاع حق العودة مخزي، الجيش ازال الخيم و اعتقل اتنين ، ليه يعني !!!! و لسة الاحداث ها تتصاعد بعد القرار المخزي بضم دائرة كوم امبو لدائرة نصر النوبة ، المجلس العسكري و حكومته شلة كدابين ، بيقولوا كلام و يرجعوا فيه زي العيال
اه الحريق اللي حصل و اعمال العنف ما ترضيش حد ، بس الكبت و الظلم يخرجوا اي انسان عن شعوره و احنا سكتنا كتير و خالص بقي مش ها نسكت تاني و لا ها نرضي نبقي مواطنين درجة تانية ، احنا مش طالبين فضل من حد ، حقنا ها نأخد ها نأخده و ها نفضل نطالب به و مش ها ننسي مهما غسلوا دماغنا و عربونا
و ها نرجع للبلد القديمة ، لو مش النهاردة يبقي بكرة ، غصب عن عين التخين 
كلمة اخيرة واقفة في زوري عايزة اقول للمشير طنطاوي كتر الف خيرك ، اثبتت ان كل الحكومات عمياء و غبية  في تعاملها معنا حتي لو كان اللي رأسها نوبي 

1 comment:

Talaat Refaat said...

لابد من علاج مشاكل النوبيين بطرق كمية ووضع بدائل للحلول الجذرية ، بعيدا عن المسكنات والكلام الوصفي المرسل ، وإلا سيتفاقم الوضع إلى درجات شديدة السوء والخطورة