Wednesday, December 28, 2011

السنة دي من عينين نوبية

السنة كانت سنة مميزة ليا ،  ابتدت بالثورة طبعا ، بس انا مش عاوزة اكتب عن الثورة و اللي عملته في حياتي المرة دي.
انا عايزة اكتب عن رؤيتي لنفسي كنوبية في مجتمع بيعيد تشكيل نفسه  ، و عايزة اركز علي رؤيتي لنفسي جوة المجتمع النوبي نفسه بالاساس . انا كان عندي اهتمام بالقضية تفاوت مع الوقت ، لكن اكتر حاجة حسيت انها فرقت معايا معرفتي اكتر عن فكرة التعددية الثقافية و امكانية الانتماء لاكثر من انتماء سواء ديني او اثني او قومي .
قبل الثورة ما كانتش حابة  اشترك في اي نشاط نوبي ، لا النادي النوبي و لا التجمعات التانية و دة لسبب شخصي بحت ، انني باشوف ان مشاركة البنات بتتشاف انها رحلة البحث السرمدية عن عريس  و عشان كدة عمري ما رحت
لغاية ما قابلت يحي في اعقاب الثورة و من كثر الزن و الالحاح ، رحت معاه اجتماع اتحاد شباب النوبة الديموقراطي ، عجبتني فكرة اننا مختلفين اللي لبيرالي و اللي يساري و اللي مش معرف نفسه ايدولوجيا و كمان احنا فاديكات و كنوز و الالطف من دة و دة البنات الجامدين اللي في الاتحاد اللي عاملين توازن و قوة دفع هايل . انا مش ناوية اتكلم عن الاتحاد كفكرة و اهداف و مهمة . انا عاوزة اتكلم عن الروح  اللي ادهاني ، مثلا يوم ما اشترينا كلنا رواية الشمندورة لمحمد خلبل قاسم اللي بتتكلم عن البلد القديم و تهجير 1932 . اول مرة احس اني شفت البلد القديمة و حسيت اننا لما قرينا الرواية كلنا اننا شفنا البلد و لو مش روئ عين .
بس رغم الفخر بتاريخ قديم و شباب زي الورد قادرين يتمسكوا بهويتهم في ظل عواصف المسخ ، مثلا حاولنا نتعلم اللغة النوبية سوا ، صحيح قليل اللي تماسك و كمل بس شرف المحاولة كان في حد ذاته مكسب . بس برضه و انا بابص للسنة اللي عدت مش شايفة الا غرق قرية ابو سمبل و مقتل المراكبي و فض الاعتصام اللي عند محافظة اسوان.
واضح ان العنت و العنف و الصلف نصيبنا من الدولة ، السؤال اللي باسأله لامتي و دة ها يؤدي لايه

3 comments:

Mohamed ElGohary said...

طيب ممكن أروح أنا المنظمة؟ ;p

Fatma Emam said...

ممكن طبعا يا استاذ جوهري

basma saghir said...

قبل الثورة ما كانتش حابة اشترك في اي نشاط نوبي ، لا النادي النوبي و لا التجمعات التانية و دة لسبب شخصي بحت ، انني باشوف ان مشاركة البنات بتتشاف انها رحلة البحث السرمدية عن عريس و عشان كدة عمري ما رحت


كلنا البنت دي يا عزيزتي