امايا يا اماه
....شدي الضفاير ...
شدي رباطها ...عصبيني
الام اللي كانت بتحلم بمستقبل احسن "لنسختها" الصغيرة ... ايوة هي عايزة بنتها الصغيرة نسخة منها ... مش نسخة من اخفاقاتها ...بس نسخة من احلامها ...من امالها. و هي بتقيد الضفيرة ، مع كل شعرة بتجدلها ، كانت بتزرع فيها ...العيب و الحرام و المفروض و الواجب و اللازم ..الشخط و التبريق و التهديد باللسع بالمعلقة و الضرب و ووووو ، كانوا وسيلتها في التأكد ان النسخة الصغيرة حفظت التعليمات صم... و الدموع و الانات كانوا درس عشان ما تتكررش الاخطاء الطفولية تاني
الجملة القاتلة اللي بتتذيل اي خناقة .... " لو ما تطلعيش عدلة .... تموتي احسن " ...طيب يعني ايه عدلة
عدلة انها تبقي طمي طيع في ايدك ...انك تلوي ضلوعها عشان تتناسب مع حلمك .... ليه يا ام بتتعملي معها انها ملكية خاصة .
لو قادرة يا اماه
قيديها
و قيدني
ليه الام تتخيل ان الطفلة لازم تبقي ست مسخوطة ... ليه تسيب العيال و اللعب عشان تساعد في البيت ...ليه تبقي ام لطفل و هي عندها 8 سنين و تراعي طفلة تانية ... و تبقي لذاتها الطفولية اختلاس او مكأفأة غير اعتيادية ...اكنها مش حق الطفلة
جوايا حيرة
جوايا ضلمة
جوايا طير قلقان في عشه
لا انا قادرة اشيله
و لا قادرة اهشه
و لما كبرت البنت و بقي عندها حاجات جديدة ... غير حاجات الطفلة .... ما لقيتش من الام اذن تسمع و حضن يضم ..مش لان الام قاسية ام ومتجاهلة ... بس لانها مش عارفة تقول ايه ...مكسوفة من البنت اللي بتمشي اول خطوة في طريقها كست ... ز مشيت في الطريق دة من غير رفقة و لا سند
كبرت البنت و القلب دق، قالت لماما ، صاحبي الفصل دة باحبه، بقي مجرد ذكر اسمه معناه خناقة و وجع راس
و عند كل مفترق طرق ، الام تجر البنت للطريق اللي هي كانت نفسها تمشيه ، فاكرة ان في نهايته السلامة
و البنت تحاول تراضيها و تحاول تعيش حياتها ... احساس بائس انك تتخانق عشان تبقي نفسك
تفكرها انها منتمية لها بس هي مش ملكها و انها من حقها تختار
و لان الضرب و اللسع ما ينفعش معاها ...يبقي العقوبات الاقتصادية و التضييق علي حريتها هو الرادع
و في الاخر.... ايه نهاية في صراع القوة ...
هل الام ها تفهم ان البنت ما ينفعش تبقي النعجة دولي البشرية
هل البنت ها تتخانق عشان الحلم
الحلم اللي الام عايزة تزرعه فيها و لا حلم البنت اللي نفسها يحررها ؟؟؟
No comments:
Post a Comment