بابا و بطة

بداية يجب ان اعترف ان بعض الالام مزمنة ..لا تشفي ..بعض الجروح لا تندمل 

جرح فراقك يا ابي لا و لن يندمل 

كم كتبت عنك و ساظل اكتب عنك يا من تسكن عروقي و ما زال قلبك ينبض حين ينبض قلبي انا و اخوتي 

لكنني قررت و بشكل واعي ان احتفل بحياتي معك 

اسعدتني و عيشت طفولة و مراهقة سعيدة لانك اهتمت بي و بشدة 

صورتي تلك معك في رحلتنا الدورية للاقصر و اسوان تلخص علاقتي بك ...تمسك الانامل الصغيرة و تنظر لي بحب و تعلمني تاريخ اجدادي و تعملني كيف ارقص و احتفل بافراحي .

اعتقد انني في هذه الصورة في الرابعة او علي الاكثر في الخامسة من عمري 

ما زلت اذكرك و حين احب ان اسمعك تتحدثني استمع الي مطربتك المفضلة فايزة احمد .... و خاصة اغنية حبيبي يا متغرب ...لكنك انت حبيبي المتغرب ...غربة ابدية ...

انت بالنسبة لي هذا المقطع :

حبيبي يا شوق عمري يا طول صبري 

يا متعود علي ناري علي جنتي 

علي غيرتي و حنيتي 

علي قسوتي علي رقتي

 علي دمعتي علي ضحكتي 

علي الحب النايم في قلبي و عينيا  

علي الشوق الصاحي لما تنام ايدك في ايديا 

علي فرحي لما تجيني يا نور عيني  

حبيبي يا مهنني يا مسليني

 ..تعالي ...تعالي ...داويني

و  حين احب ان احدثك ...تتحدث علي لساني فايزة احمد في نفس الاغنية :

اعذرني علي البعد انا مش باقدر 

 و اعذرني قد ما تقدر .....

قد عيوني عليك ما بتسهر ...

قد ما بافكر فيك 

و استنظر ...اه و استنظر

قد الشوق اللي بيقتلني ..قد البعد اللي مجنني  

ساحاول ان اتوقف عن لومك لانك استعجلت الرحيل ....

ما زالت اتذكر حواراتنا العميقة جدا جدا ... كنت احكي لصديقة عن حوارنا الجاد حين اتممت العاشرة و استدعيتني للكي اختار رياضة انتظم في ممارستها في الاجازة الصيفية و كان الحوار كالتالي :

بابا: ها يا بطة انتي عاملة تتعلمي سباحة و مش ملتزمة و لسة برضه مش عارفة تعومي ...شوفي لك لعبة تانية 

بطة : فروسية انا باحب الحصنة 

بابا: فروسية ؟؟؟ دي غالية اوي يا بطة و انتي فرسنا اصلا 

بطة : انا ؟؟

بطة : طب تنس 

بابا: المضرب غالي برضه و ها تقطعيه كل شوية 

بطة : طب اسكواش 

بابا: اغلي يا ماما ...فكري في حاجة من اللي شوفتيهم في النادي 

بطة : رماية ... حلوة بقي ؟

بابا : طيب 

المهم روحنا النادي قالوا لنا لازم اكون معدية ال 16 عشان الادوات خطرة ...المهم لعبت هاند بول ..كرة يد يعني و اعتزلت بعد امجاد بشعة و فظيعة جدا عشان باكره الالم و الشد العضلي و ثانوية عامة و حلمي في الالتحاق بكلية قمة

لا انسي سعادتي كل اتنين و بابا جايب لي مجلة ماجد و الجمعة و هو جايب ميكي و ميكي جيب و سعادتي الطاغية لما نتفرج علي 

ماتش و ابقي عارفة اللعيبة ...

و يقول لي انتي اتولدتي لما كان كأس العالم في المكسيك ...و مع كل كأس عالم ..تكبر بطة و تعرف ان الارجنتين فيها مارادونا و عاصمتها بيونرس ايرس ( طبقا لمعلومات ملف الدول الدوري في مجلة ماجد)  و البرازيل دي احرف تيم كورة و احسن حد فيهم بيليه و الوحيدين اللي في امريكا اللاتينية اللي مش بيتكلموا اسباني بيتكلموا برتغالي و معلومات كتير بقي طول التسعيم دقيقة ..

و يجي احلي كأس في ايطاليا ..عشان اول مرة اشجع مصر بقي ..و حمادة كان عنده سنة و اربع شهور ...و بابا شاله علي رقبته و فضل يهتف جوهري جوهري و عيال في الشارع و انا و هبة معاهم ...بغض النظر عن الذل اللي طلعوا علينا مجدي عبد الغني بسبب 

الجون اليتيم دة و لما صيفنا الصيف دة حمادة كان و ما زال لطيف و حلو و كان بيقعد يلعب علي الشط ..كل الناس تلاعبه و تقوله ميلا و هو يفرح عشان عارف ان ميلا هو اللعيب الحلو اللي بيرقص كل ما يجيب جون  

لسة فاكرة صدمة ابويا  لما اكتشف اني تحولت فجأة لانثي ...مرة بص لي و انا لابسة و خارجة و قال لي  ... انتي عاملة كدة ليه ...انا قلت ازاي يعني ؟؟ ابتسم و قال كبرتي  

بابا مشي في 1 مايو 1999 يعني السنة دي ها يكمل 15 سنة بعيد .... محمد اصغرنا بقي ما شاء الله عريس 

خد منه الوسامة و السمت الطيب 

فاكرة اخر حاجة قالها لي و انا راجعة من درسين ورا بعد في مراجعات ثانوية عامة ...

بطة انتي جدعة و مثابرة و ربنا ها يوفقك 

دعوتك هي اللي قاعدة لي يا ابويا