و يبقي الشدو النوبي ...خير دواء للاحزان

في الايام الصعبة اللي احنا فيها دي ...دايما بادور علي مرفأ سلام ...لحظة صفا ... حالة سكون ...و العملة النادرة بقيت هي السعادة 

النهاردة كنت محظوظة اني روحت حفلة الفنان النوبي أحمد اسماعيل، كنت محتاجة اني اطلع من التفاصيل ... لا انكر ان وطأة الاحداث تجبرني علي التعاطي معاها ...و الفضاء المخملي و التحصن بالسعادة ، بقي غير مجدي ... و للاسف السخافات و الاحزان تقتحم حياتي عنوة

كنت فرحانة ان الحفلة ما اتلغيتش و كمان ان العدد كان كتير و ان الناس سعيت انها  تحضر و ان الحضور لم يقتصر علي النوبيين فقط . احمد اسماعيل عمل فكرة حلوة اوي ، و هي جولة في النوبة التاريخية من اول اسوان لحلفا و دنقلة و عبر القبائل  النوبية و لهجاتها المختلفة : الفاديكا و الكنوز و المحس و السكوت، حبيت اوي فكرة اننا لسة كتلة واحدة، رغم تقسيمات القبائل و التقسيم الاقسي اللي فرضته علينا السياسة و الحدود

الحفلة كانت فيها روح ، العطور النوبية مغلفة المكان و تخلق جو من الالفة ، اكننا في زفاف و لا حنة ... و الوجوه السمراء و تناغمها مع الالوان اللي لابساها و سعادتها اللي باينة في البسمات الصافية و لغة الجسد اللي بتظهر الانسجام مع المزيكا .  و زي اي تجمع نوبي بيبان ان النوبيين محبين للحياة و ان الفن جزء اصيل من تكوينهم و كمان بقي اداة للحفاظ علي الهوية امام امواج الذوبان ... تحيات الجمهور للمطرب احمد اسماعيل علي السلطنة اللي كان فيها و رده الودود بتحية مماثلة ، بتأكد ان احترام الفن و اهله تقليد راسخ في العقلية النوبية

حبيت كمان حضور الدف ، انا فعلا اكتشفت ان الاورج في المزيكا النوبية كريه و اني شديدة التقليدية و باحب الدف و العود اكتر.
دة غير ان  حبيت اوي وجود فرقة علي المسرح بترقص ورا احمد اسماعيل و البنات بالتوب و الرجالة بالجلاليب البيضا و الطاقية النوبية الملونة

الفنان احمد اسماعيل بالزي التقليدي النوبي

 .
 و كان في حاجة غريبة جدا هي ان في بنت بتقدم الحفلة و يعني سيطرت علي وقت طويل و اتكلمت كتير اوي ، بس يعني لما سألت احمد  اسماعيل عن ارائه في بعض الموضوعات ، منها القضية النوبية ، احمد اسماعيل دق علي وتر حساس و هو فرقة النوبيين و تفرق دم القضايا بين القوي النوبية الكتير و الهيئات و الائتلافات الكتير جدا ... و قال لو كنا صوتنا صوت رجل واحد و رجع و عدل كلامه و قال شخص واحد ...كان القضية اتحلت علي طول ... انا كنسوية انبسطت من لفظة شخص ، احسن من لفظة رجل اللي بتقصي  النوبيات  و كمان حبيت اوي لما بين تأثره بالراحل فنان افريقيا محمد وردي

صورة من الحفلة تصوير محمد خوجلي

 
و كمان احترمت اوي انه و في اول حفلة له في الساقية ، خصص جزء من وقته لمغني تاني يشاركه الحفلة  اكتر حاجة لفتت نظري التي شيرت اللي كان لابسه اللي مكتوب عليه " نوبي انا

ايوة الفن جزء من هويتي ... ايوة انا بادور علي السعادة في عبير اللغة اللي مش فاهمة و بتفكرني بالجدات ....
و ايوة ....  فخورة انا بحضارتي و بكل تجلياتها ..... فخورة انا بحضارتي