عندما تكوني مجرد مثير جنسي .. لا يرقي لدرجة انسان

انا باحب اكتب عن تجاربي عشان ساعات باحب اشوف لحظاتي الحلوة مرات و مرات ، اما اللحظات الصعبة برضه باحب اشوف ازاي عديت منها و بقيت اقوي و اهدأ ....بس في لحظات مجرد ذكرها شئ منفر و بيخليني اغضب و احاول انساها او اتجاهلها . 

و ان اكتر اللحظات اللي باكره اني اتكلم عنها ، ذكريات التحرش الجنسي ، عشان لو كنت انا و بنات كتير ، عايشين حياتنا عشان نثبت اننا بشر ...لنا نفس القدرات و عندنا عقليات جديرة بالاحترام . التحرش مؤلم لانه بيحسسني اني مسجون في جسد انثي ... جسد المقهور ، المفعول به، اللي لازم يهرب من كل ايد عاوزة تلمسه و كل عين بتتفحصه .

انا في العادي سعيدة و بامشي في الشارع بقوة و ثقة... بس ديتها نظرة خبيثة ، او كلمة حقيرة ... و كل ثقتي في نفسي تتهز و احس اني زي السحلفاة اللي عاوزة تستخبي جوة نفسها.

التحرش بيتفهم غلط انه للاناث البالغة و دة مش حقيقي ، انا لسة فاكرة كويس اول حادثة تحرش و انا في 1 اعدادي و كنت رايحة المدرسة ، واحد في عربية نادني انا و صاحبتي و انا افتكرت انه عايز سجاير من الكشك و لا حاجة، روحنا لقيناه قالع البنطلون و بيقول هو عايز يعمل فينا ايه، و مسك صاحبتي و انا جريت و صوتها و هي بتصرخ رجعني تاني ، قعدنا نعض فيه ، لغاية ما حد عدي من الشارع و هو طلع بالعربية . سهل اوي اني اجتر الالم دة علي طول  و اعتقد ان الذكري دي ها تعيش معايا للابد . 

نفسي الخوف اللي حسيت به و انا صغيرة بيتكرر و ان كان بدرجات مختلفة و حسب المواقف المختلفة، يعني اكثر المرات رعبا ، الشهر اللي فات ، لما سواق التاكسي برضه فتح البنطلون ، انا كنت حاسة ان في حاجة غلط بس قلت انا موسوسة ، لغاية ما بصيت علي العداد و عينيا راحت شمال و شفت المنظر المقزز. كان كل خوفي انه يقفل اللوك بتاع العربية و احنا في صلاح سالم عند النزهة و ساعتها اي شارع هادي في النزهة، كان ها يشهد جريمة اغتصاب او في احسن الاحوال هتك عرض, حظي كان حلو انه خاف من صريخي و نزلني ...بس لغاية دلوقتي عندي فوبيا و مش بابطل مراقبة لايدي السواقين. 

و الخوف بيتكرر كل ما امر ادام مجموعة شباب و ادعي ان ما حد يوصف كل تفصيلة في جسمي و لا يتريق انهم نسيوني في الفرن و لا اني باكاكادسا...طبعا انا التحرش بتاعي متنوع بقي ، يعني تحرش جنسي علي عنصرية ، خليط  قمئ جدا.

اوحش حاجة في التحرش انه بيكسر النفس ، بتحس ان ايد المتحرش مغروسة في جلدك ....ختم عليك ...زي ختم العبيد، و لاننا مجتمع قاسي ، البنت بتفقل نفسها علي همها و تمشي شايلة المها لوحدها .....عشان اول سؤال كنتي ماشية ازاي ، كنتي لابسة ايه ..... دايما هي مش اكتر من مثير جنسي ...عمرها ما ترتقي لطبقة انسان